Verkefni lögreglunnar á höfuðborgarsvæðinu í gærkvöldi og í nótt
Lögreglan á höfuðborgarsvæðinu fékk tilkynningu, um klukkan hálf eitt í nótt, um mann sem var að stela eldsneyti af vinnuvél við Hafravatnsveg. Að sögn lögreglu fór maðurinn af vettvangi þegar tilkynnandi atviksins kom að honum og ók meðal annars á bifreið hans.
Að sögn lögreglu náðist skráningarnúmer hins meinta þjófs og er málið í rannsókn.
Á fjórða tímanum í nótt var bifreið stöðvuð í Vesturborginni. Ökumaðurinn er grunaður um akstur undir áhrifum lyfja, en auk þess var bifreið mannsins talsvert skemmd. Ökumaðurinn er grunaður um að hafa ekið á skilti á hringtorgi við Bauhaus á Vesturlandsvegi.
Að sögn lögreglu kom læknir á lögreglustöð og mat hæfni ökumanns til að stjórna ökutæki. Að því loknu var ökumaðurinn vistaður í fangageymslu vegna rannsóknar málsins.
Á tólfta tímanum í gærkvöldi var maðurinn handtekinn á heimili í Breiðholti vegna gruns um heimilisofbeldi. Hann var vistaður í fangageymslu vegna rannsóknar málsins.
Loks var tilkynnt um eld við Vatnsveituveg í Elliðaárdalnum neðan við stíflu rétt fyrir klukkan þrjú í nótt. Þarna höfðu tveir menn ákveðið að kveikja varðeld og var þeim gert að slökkva eldinn.