Sara Mansour, tvítug Reykjavíkurmær, segist ávallt taka ljósmynd af öllum hótelherbergjum sem hún dvelur í. Það gerir hún til að hjálpa lögreglu og saksóknurum um allan heim við að finna fórnarlömb vændis og mansals.

„Ég er búin að taka mynd af hótelherberginu mínu í Barcelona og geri það í hvert skipti sem ég gisti á nýjum stað. Af hverju? Af því að ég hleð þeim upp á vefsíðuna traffickcam.com. TraffickCam er gagnagrunnur mynda sem lögreglan og saksóknarar notast við til að finna fórnarlömb vændis og mansals.

Auglýsingar á þess háttar starfsemi eða barnaklámi eru endranær teknar á hótelum svo myndirnar sem við gefum lögreglunni gegnum TraffickCam getur hjálpað þeim að finna samsvörun og hefur bjargað þúsundum kvenna og barna frá viðstöðulausu ofbeldi kynlífsánauðar. Ég hvet alla til að taka myndir af hótelherbergjunum sínum. Saman getum við bundið enda á mansal,“ skrifar Sara á Facebook.

Appið var kynnt í júní í fyrra og í umfjöllun CNN um það síðastliðinn mars var greint frá því að um hundrað þúsund manns hafi notað það. Þá hafði appið safnað í gagnabanka sinn myndum frá ríflega 150 þúsund hótelum víðs vegar um heim.

Appið myndgreinir hvert herbergi og þannig má finna ákveðin mynstur svo sem málverk, útsýni út um glugga og teppamynstur. Lögregla getur svo borð saman myndir af vændisauglýsingum eða barnaklámi og fundið staðsetninguna sem myndirnar voru teknar.

Hér má nálgast appið fyrir Android-síma og hér fyrir iPhone.