„Við gerum okkur grein fyrir að niðurstaða þarf að fást í málið og að við getum ekki beðið lengur. Okkur þykir þetta mjög miður enda hefur eitthvað líkt þessu aldrei komið fyrir áður,“ segir Erna Guðrún Agnarsdóttir, námsstjóri hjá Endurmenntun HÍ, í samtali við Fréttablaðið sem greinir frá því að próf nemenda í námi til löggildingar fasteigna- og skipasala hafi týnst í pósti.

Samkvæmt Fréttablaðinu hafa nemendur ekki enn fengið einkunnir sínar þar sem prófin finnast ekki. Kennarinn í náminu býr í Austurríki og hefur honum ekki enn borist prófin í pósti, en þrjár vikur eru síðan prófið fór fram.

Erna Guðrún segir að svo virðist sem að mannleg mistök hafi leitt til þess að prófin hafi ekki verið send í rekjanlegum ábyrgðarpósti. Yfirleitt séu allar sendingar á vegum Endurmenntunar sendar í slíkum pósti. Nemendur við námið gagnrýna seinagang HÍ við að komast til botns í málinu. Erna Guðrún fullyrðir að niðurstaða verði komin í málið fyrir helgi.