Svo virðist vera sem mafían á Sikiley sé í auknum mæli farin að færa sig norðar á bóginn – og þá einna helst til Þýskalands – í leit að tækifærum til að græða peninga.
Ástæðan er sú að efnahagsástandið á Ítalíu er ekki upp á marga fiska og sú staðreynd að ítölsk yfirvöld hafa að undanförnu lagt á það þunga áherslu að uppræta mafíustarfsemi í landinu.
Þetta kemur fram í gögnum sem breska blaðið Guardian hefur undir höndum og fjallar um á vef sínum.
Þann 21. júní síðastliðinn voru nítján handteknir í Villingen-Shwenningen í suðvesturhluta Þýskalands vegna gruns um umfangsmikið smygl á fíkniefnum. Lögregla lagði hald á fjórar milljónir evra í peningum og öðrum verðmætum. Um var að ræða samstarfsverkefni lögreglunnar í Þýskalandi og lögregluyfirvalda í Palermo á Sikiley.
Í umfjöllun Guardian kemur fram að hópurinn, sem á rætur að rekja til Ítalíu, hafi starfað í Rottweil og Stuttgart í Baden-Württemberg sem liggur að landamærum Frakklands og Sviss. Fátækt í þessu héraði Þýskalands er með allra minnsta móti og telur lögreglu að það hafi verið með ráðum gert hjá mafíunni að hefja starfsemi á þessu svæði einmitt af þeim sökum.
Hópurinn er sagður hafa smyglað fleiri tonnum af marijúana og kókaíni frá Albaníu til Þýskalands. Mafían hafi svo stundað peningaþvætti á svæðinu, meðal annars með því að fá bareigendur til að koma fyrir spilakössum á börunum. Telur lögregla að hópurinn hafi starfað fyrir Mondino-fjölskylduna, sem er mafía í Palermo.
Það er ekki einungis Mondino-fjölskyldan sem horfir til norðurhluta Evrópu. Lögregla telur einnig að hin valdamikla Cosa Nostra-mafía hafi einnig fært út kvíarnar og hafið starfsemi í Þýskalandi þar sem efnahagsástand er með besta móti.
Í umfjöllun Guardian kemur fram að fjögur þúsund einstaklingar tengdir ítölsku mafíunni hafi verið handteknir á Sikiley frá árinu 1990.