Tónlistarmaðurinn Kristján Freyr Halldórsson hvetur foreldra til að passa upp á börnin sín
Kristján Freyr Halldórsson, tónlistarmaður, rokkstjóri Aldrei fór ég suður og textahugmyndasmiður, greinir frá því á Facebook að sonur hans hafi verið rændur við Reykjavíkurveg um hábjartan dag. Hann hvetur foreldra til að passa upp á börnin sín en þó ekki að skerða frelsi þeirra.
„Hann Stefán okkar, 14 ára, lenti í ömurlegu atviki síðasta laugardag þegar hann var á leið til vinar síns í Hafnarfirði með strætó. Hann fer út við Reykjavíkurveg þar sem ungur maður, 25 til 30 ára, stöðvar hann og ávarpar á ensku um að hann vanti síma til að hringja á lögregluna. Stefán sér aumur á manninum, lánar honum símann sinn sem hrifsar hann af honum og skoðar hátt og lágt.
„Þegar Stefán biður um símann sinn aftur þá er honum ógnað af manninum sem var með félaga sinn með sér skrefum frá. Þeir strunsa þá burt með símann og Stefán hrópar á eftir þeim en þá gerir annar maðurinn sig líklegan til að ráðast á drenginn. Stefán hleypur þá burt og hinir tveir hverfa svo í aðra átt,“ segir Kristján Freyr.
Hann leggur áherslu á að þrátt fyrir þessa leiðindaupplifun ættu foreldrar ekki að skerða frelsi barna sinna. „Það er leitt að börn fái þá tilfinningu að þau séu ekki örugg á götum úti. Pössum uppá krakkana okkar en um leið leyfum ekki ótta eða tortryggni skemma frelsi og sakleysi þeirra,“ segir Kristján Freyr.
Hann segir Stefán hafa brugðist hárrétt við en hann stöðvaði bíl og fékk að hringja í lögregluna. Hann segir að lögregla sé nokkuð viss um að hún hafi fundið sökudólginn en síminn fannst þó ekki.
Sambærileg atvik varð við Sundlaugaveg á mánudaginn en þá var farsíma stolið af 12 ára dreng. Að sögn lögreglu hafði eldri piltur, líklega á aldrinum 16 til 18 ára, beðið um að fá símann lánaðan áður en hann hljóp á brott með símann.
Í Facebook-hóp fyrir íbúa Laugarneshverfis var þjófnum lýst svo: „Strákurinn var dökkhærður með hár sem rétt náði fyrir aftan eyru, með eyrnalokk amk í öðru eyranu og c.a 170-175 cm á hæð. Hann var í rauðri adidas hettupeysu og svörtum íþróttabuxum.“
Kristján Freyr segir í samtali við DV að foreldrar ættu að vara börn sín fyrir slíkum óprúttnum aðilum. „Það virðast einhverjar gripdeildir í gangi. Ógæfufólk að fjármagna meiri ógæfu eða eitthvað,“ segir Kristján Freyr.