Verkefni lögreglunnar á höfuðborgarsvæðinu í gærkvöldi og í nótt
Lögreglan á höfuðborgarsvæðinu fékk tilkynningu um þjófnað rétt fyrir klukkan 21 í gærkvöldi en þar hafði farsíma verið stolið af tólf ára gömlum dreng við Sundlaugaveg.
Að sögn lögreglu hafði eldri piltur, líklega á aldrinum 16 til 18 ára, beðið um að fá símann lánaðan áður en hann hljóp á brott með símann.
Stuttu áður, eða klukkan 20.32, fékk lögreglu tilkynningu um þjófnað úr matvöruverslun í Kópavogi. Þar hafði ungur maður farið úr versluninni með fulla körfu af vörum án þess að greiða fyrir. Hann fannst skömmu síðar þar sem hann var kominn inn á heimili með vörurnar. Málið var afgreitt á vettvangi og vörunum skilað.
Þá var tilkynnt um innbrot og eignaspjöll í leikskóla í Seljahverfi í Breiðholti. Þar hafði verið spenntur upp gluggi og farið inn, en ekki er vitað hvort einhverju hafi verið stolið.
Loks handtók lögregla ungan mann í annarlegu ástandi á tólfta tímanum í gærkvöldi og vistaði í fangageymslu. Maðurinn hafði verið með gleðskap og læti á heimili í Grafarvogi. Að sögn lögreglu býr maðurinn ekki í íbúðinni og hafði ekki leyfi frá húsráðanda.
Þessu til viðbótar voru sex ökumenn stöðvaðir í gærkvöldi og í nótt sem grunaðir eru um akstur undir áhrifum fíkniefna.