Grunaður um akstur krossara undir áhrifum fíkniefna
Lögreglan á höfuðborgarsvæðinu handtók karlmann í miðborg Reyjavíkur klukkan rúmlega átta í morgun vegna gruns um akstur krossara undir áhrifum fíkniefna. Þá var hann með meint fíkniefni í fórum sínum.
Í tilkynningu frá lögreglu kemur fram að áður en maðurinn var handtekinn hafi hann reynt að komast undan lögreglu á hjólinu. Hann fannst skömmu síðar eftir eftirför lögreglu þar sem hann hafði skilið við hjólið og falið sig skammt frá því.
Að sögn lögreglu hafði maðurinn meðal annars ekið upp á gangstétt þegar hann var að reyna að komast undan lögreglu. Skapaðist mikil hætta fyrir gangandi vegfarendur. Þá var torfæruhjólið ótryggt og ekki í löglegu ástandi.
Maðurinn var fluttur á lögreglustöð þar sem hann var færður í blóðsýnatöku og í framhaldinu vistaður í fangaklefa þar til hægt verður að taka af honum skýrslu.