Kennarinn sagði „no jump“ – Vera misskildi og taldi hann hafa sagt „now jump“
Dómstóll í Cantabria á Spáni hefur úrskurðað að dauði sautján ára stúlku, Veru Mol, sem lést í teygjustökki skammt frá Cabezón de la Sal í norðurhluta Spánar árið 2015, megi að nokkru leyti rekja til lélegrar enskukunnáttu leiðbeinandans.
Vera, sem var hollensk, var með hópi vina þegar kom að því að fara í teygjustökk. Svo virðist vera sem hún hafi talið að allt væri klappað og klárt fyrir stökkið en svo reyndist ekki vera. Hún hrapaði til bana þar sem öryggisfestingar voru enn lausar.
Vitni að atvikinu sögðu að enskukunnátta leiðbeinandans hafi ekki verið upp á marga fiska. Þannig hafi hann sagt „no jump“ en Vera líklega misskilið hann og talið hann hafa sagt „now jump“ eða „stökktu núna“.
Málið fór fyrir dómstóla og samkvæmt úrskurði dómstóls í Cantabria á dögunum á fyrirtækið sem stóð fyrir stökkinu, FlowTrack, nú yfir höfði sér saksókn vegna manndráps af gáleysi. Að mati dómstólsins hefði verið hægt að koma í veg fyrir dauða stúlkunnar hefði leiðbeinandinn notað rétta ensku og sagt „don‘t jump“, eða „ekki stökkva“.
Þá var sett út á það að leiðbeinandinn hafi ekki athugað með aldur stúlkunnar, en samkvæmt reglum fyrirtækisins verða þeir sem fara í teygjustökk að hafa náð átján ára aldri. Vera var sem fyrr segir 15 ára.