Karlmaður búsettur á Austurlandi hefur verið dæmdur í árs fangelsi fyrir heimilisofbeldi gegn föður sínum og að smygla 550 grömmum af hassi til Grænlands. Dómur féll í málinu í gær. Maðurinn á að baki talsverðan sakaferil en hann hefur hlotið 18 refsidóma frá aldamótum.

Maðurinn er dæmdur fyrir að hafa, í eldhúsi sameiginlegs heimilis þeirra feðga, slegið föður sinn nokkur hnefahögg í höfuð og andlitið. Faðir mannsins hlaut talsverða áverka af þessu, þar með talið brot á andlitsbeinum vinstra megin. Auk þess skertist hreyfigeta vinstra auga og lokun neðra augnloks vinstra megin skaddaðist. Faðir mannsins þurfti að leggjast undir aðgerð og lá á sjúkrahúsi í nokkra daga.

Í dómi kemur fram að maðurinn hafi ekki sýnt sérstaka iðrun fyrir dómi vegna líkamsárásar gegn föður sínum. Hann kvað þá feðga vera sátta í dag og sagðist hann annast föður sinn en hann býr enn á heimilinu. Dómari taldi að ekkert hafi verið lagt fram í málinu sem styddi þessa staðhæfingar og það væri ekki til refsmildunar að hann byggi enn á heimilinu.

Líkt og fyrr segir var maðurinn jafnframt dæmdur fyrir fíkniefnasmygl til Grænlands farþegi með flugi frá Íslandi til Ilulissat. Hann hafði falið 550 grömm af hassi í líkama sínum í 107 pakkningum. Hann var jafnframt gómaður við að stunda kannabisræktun í bílskúr við heimili þeirra feðga.