Ikea á Íslandi mun bíða eftir rannsókn – Getur gerst með glansandi nýja stálmuni
Svíinn Richard Walter sat í garðinum hjá sér á sólríkum degi með skál af vínberjum sér við hlið þegar hann fann allt í einu brunalykt. Fyrst hélt hann að lyktin kæmi frá grillveislu nágrannans en svo sá hann að að það voru vínberin sem voru að sviðna.
Í viðtali við Aftonbladet segir Walter: „Ég sá brunann í vínberjaskálinni og hugsaði með mér hvernig þetta væri mögulegt. Svo sá ég punkt þar sem ljósið hitti greinarnar á vínberjaklasanum og sá að þar byrjaði þetta…. Ímyndið ykkur ef skálin væri skilin eftir í glugga með gluggatjöldum. Þið sjáið hvað getur gerst.“
Skálin er af gerðinni Blanda blank, úr ryðfríu stáli, og er til dæmis seld hér á Íslandi í nokkrum stærðum. Emil Eriksson, talsmaður Ikea í Svíþjóð, segist taka málið mjög alvarlega og að rannsókn verði gerð á skálinni.
Þórarinn Ævarsson, framkvæmdarstjóri Ikea á Íslandi, segir að þetta geti gerst með ýmsa stálmuni, sérstaklega ef þeir eru nýir og glansandi eins og skálin í myndbandinu virðist vera. Eftir notkun og þvott mattast skálin og þá minnkar endurvarp sólarinnar frá henni. Hann sagði jafnframt að Ikea á Íslandi myndu ekki taka skálina úr sölu fyrr en heyrst hefði í höfuðstöðvunum í Svíþjóð.