Lögreglumenn sem voru í eftirlitsferð á Vestfjörðum aðfaranótt laugardags óku fram á bifreið sem hafði verið ekið á gangnavegg Vestfjarðarganga.

Í dagbók lögreglu kemur fram að þetta hafi verið um hálf fjögur leytið aðfaranótt laugardags, en að sögn lögreglu var ökumaðurinn, sem var einn í bílnum, meðvitundarlaus og með áverka, en þó ekki lífshættulega.

Sjúkrabifreið var kölluð á vettvang og tækjabíll slökkviliðsins, en ökumaðurinn var fastur í bifreiðinni. Hann komst fljótlega til meðvitundar en reyndist hafa lærbeinsbrotnað í slysinu.

Að sögn lögreglu bendir allt til þess að tildrög slyssins megi rekja til þreytu og syfju. Hann var spenntur í öryggisbelti og öryggispúðar bifreiðarinnar virkuðu sem skyldi.