Johan Gustafsson var í haldi liðsmanna samtaka sem tengjast Al-Qaeda
Johan Gustafsson, 42 ára gamall Svíi, er kominn heim til Svíþjóðar eftir að hafa verið í haldi mannræningja í Afríkuríkinu Malí frá árinu 2011. Honum var rænt af liðsmönnum Al-Qaeda.
Margot Wallström, utanríkisráðherra Svíþjóðar, staðfesti þetta við sænska fjölmiðla í dag en áður hafði Expressen greint frá því að Johan væri laus úr haldi. „Hann virðist vera við góða heilsu,“ sagði Margot í yfirlýsingu sinni.
Það var í nóvember 2011 að Johan var á ferð í nágrenni Timbúktú í norðanverðu Malí. Hann hafði farið til Malí á mótorhjóli frá Svíþjóð og sat á kaffihúsi ásamt þremur öðrum Vesturlandabúum þegar vopnaðir menn létu til skarar skríða. Einn fjórmenninganna, þýskur ríkisborgari, var skotinn til bana en hinir þrír, Johan þar á meðal, voru teknir gíslingu.
Einn þeirra, hollenskur ríkisborgari, slapp úr haldi vorið 2015 en óvíst er um afdrif Suður-Afríkumannsins Stephen McGowan.
Blaðamannafundur verður haldinn vegna komu Johans til Svíþjóðar klukkan 19 í kvöld að staðartíma.