Ótrúleg mistök starfsmanna líkhúss
Ellefu dögum eftir að hann fylgdi syni sínum til grafar fékk Frank Kerrigan óvæntasta símtal sem hann hefur nokkru sinni fengið.
Sonur Franks, sem einnig heitir Frank Kerrigan, hafði ekki átt sjö dagana sæla síðustu misseri. Auk þess að glíma við geðræn vandamál bjó hann á götunni.
Það var svo þann 6. maí síðastliðinn að maður fannst látinn fyrir aftan verslun Verizon í suðurhluta Kaliforníu. Líkið var flutt í líkhús skammt frá og til að gera langa sögu stutta fékk Frank eldri staðfestingu frá réttarlækni að líkið væri af syni hans. Síðar átti eftir að koma í ljós að sonur hans var sprelllifandi.
Þegar Frank eldri hringdi í líkhúsið spurði hann hvort hann þyrfti ekki að mæta til að bera kennsl á son sinn. Starfsmaður sagði að það væri óþarfi þar sem staðfesting hefði þegar fengist með því að taka fingraför af hinum látna.
„Þegar einhver segir mér að sonur minn sé látinn, að þegar sé búið að fá það staðfest með fingraförum, þá trúir maður því,“ sagði Frank eldri við AP-fréttastofuna um helgina.
Þann 12. maí síðastliðinn, tæpri viku eftir hið meinta andlát, héldu aðstandendur útför sem kostaði sem nemur tveimur milljónum króna. Fimmtíu manns létu sjá sig í erfidrykkjunni og var líkinu komið fyrir skammt frá eiginkonu Franks eldri.
Það var svo þann 23. maí síðastliðinn að Frank eldri fékk símtal frá vini sínum. „Sonur þinn er á lífi,“ sagði hann og bætti við að Frank yngri hefði bankað upp á og væri fyrir utan útidyrnar. Hann reyndist vera á lífi og gott betur en það, raunar við þokkalega heilsu eftir allt saman.
Ekki liggur nákvæmlega fyrir hvað varð til þess að starfsmenn líkhússins fóru mannavilt. Lögmaður fjölskyldunnar segir að svo virðist vera að starfsmenn hafi einungis stuðst við gamla mynd úr ökuskírteini Franks yngri. Fjölskyldan hyggst fara í mál vegna mistakanna.