Sex fangar sem afplána fangelsisdóma í Georgíuríki í Bandaríkjunum fá dóma sína stytta eftir að hafa bjargað lífi fangavarðar í fangelsinu.

Fangarnir sem um ræðir voru að vinna við að slá gras í kirkjugarði skammt frá fangelsinu þegar fangavörðurinn, sem átti að gæta þeirra, hneig skyndilega niður. Steikjandi hiti var á svæðinu þennan dag, 12. júní síðastliðinn. Síðar kom í ljós að fangavörðurinn hafði fengið hjartaáfall en honum hafði liðið einkennilega fyrr um daginn og kennt sér meins í brjósti.

Fangarnir brugðust skjótt við, nokkrir úr hópnum gripu til skyndihjálpar og beittu hjartahnoði á meðan hinir fóru og sóttu hjálp. Sjúkraflutningamenn komu svo á staðinn og fluttu fangavörðinn á sjúkrahús þar sem hann er á batavegi. „Hann hneig skyndilega niður og það var augljóst að hann átti erfitt með að anda,“ segir einn fanganna.

Fangavörðurinn var einn með sexmenningana í sinni umsjá og hefðu fangarnir hæglega getað strokið. Fangabifreið, bíllyklar og byssa fangavarðarins voru steinsnar frá þeim. Í samtali við WKYC-sjónvarpsstöðina segja þeir að það hafi aldrei hvarflað að þeim að strjúka eða gera eitthvað sem þeir áttu ekki að gera. Þarna hafi mannslíf verið í húfi.

Fangelsismálayfirvöld hafa ákveðið að verðlauna fangana fyrir skjót viðbrögð. Fá þeir fjórðung þess dóms sem þeir hlutu niðurfelldan. Þetta þýðir til dæmis að fangi sem hlaut tveggja ára fangelsisdóm fær sex mánuði fellda niður.