Í aprílmánuði síðastliðnum fannst Aramazd Andressian, 35 ára gamall maður, meðvitundarlaus í almenningsgarði nálægt Pasadena í Kaliforníu, og var fluttur á sjúkrahús. Bíll mannsins fannst á bílastæði í nágrenni garðsins og var bíllinn allur útataður í bensíni. Sonur mannsins, fimm ára gamall, var horfinn.
Barnsmóðir Adressian, en þau eru fráskilin, hafði þann 22. Apríl samband við lögregluna og tilkynnti um hvarf sonar síns. Sagði hún að faðir drengsins hefði farið með henn í Disneyland skemmtigarðinn og ekki skilað honum til baka. Drengurinn hefur ekki fundist eftir þetta og síðast sást hann á öryggismyndavél í Disneylandi að kvöldi 20. apríl.
Sex dögum eftir hvarf sonar síns birti Andressian tilkynningu þar sem hann bað almenning um að liðsinna sér: „Mér er mikið í mun að finna son minn og nafna minn, Aramazd Jr, og ég þarf hjálp frá almenningi. Ég bið og vona að barnið mitt snúi aftur heilt á húfi,“ sagði meðal annars í yfirlýsingu.
Adressian kunni ekki skýringu á því hvers vegna hann fannst meðvitundalaus úti í almenningsgarðinum. Hann segist hafa misst minnið en telur líklegt að ráðist hafi verið á þá feðga.
Í maímánuði leitaði lögreglan að vísbendingum á heimili móður drengsins og hafði á brott með sér þaðan nokkra hluti, en ekki hefur verið uppgefið hverjir þeir voru.
Nýjustu fréttirnar í þessu dularfulla máli eru síðan þær að Andressian hefur verið handtekinn og ákærður fyrir morð á syni sínum. Var Andressian staddur í Las Vegas er lögregla handtók hann, en hann verður fluttur í heimahérað sitt, Los Angeles sýslu, innan tíðar, þar sem hann mun sitja í gæsluvarðhaldi fram að réttarhöldum nema hann reiði fram 10 milljón dollara tryggingu.
Drengurinn hefur hins vegar ekki fundist, hvorki lífs né liðinn, en víðtæk leit var gerð í almenningsgarðinum þar sem Andressian fannst meðvitundarlaus.
Ekki hefur komið fram hvaða sönnunargögn það eru sem leitt hafa til handtöku Andressian. Hann var þegar í upphafi grunaður um að vera valdur að hvarfi drengsins en lögregla taldi sig þá ekki hafa í höndum nægar sönnunargögn til að krefjast gæsluvarðhaldsúrskurðar.
Nánar má lesa um málið á Huffington Post.