Forsvarsmenn Facebook hafa ákveðið að hefja tilraun sem gerir fólki erfiðara fyrir að afrita forsíðumyndir, eða svokallaðar profile-myndir, af samfélagsmiðlinum.

Tilraunin mun hefjast í Indlandi og ef hún reynist vel gæti vel farið svo að hún muni ná til fleiri landa. Tilgangurinn er sá að gefa notendum meira vald yfir sínum myndum og stemma stigu við því að myndirnar séu misnotaðar eða notaðar án leyfis.

Í frétt breska blaðsins Mirror kemur fram að Indland hafi orðið fyrir valinu vegna þess að þar er auðkennisþjófnaður tiltölulega algengur. Aarati Somen, einn af vörustjórum Facebook, segir við Mirror að þar í landi séu mýmörg dæmi um konur sem þora ekki að birta andlitsmyndir af sér af hættu við að þær endi í röngum höndum.

Aðgerðir Facebook fela meðal annars í sér að ekki verður hægt að hlaða forsíðumyndunum niður eða deila þeim í gegnum Facebook Messenger. Þá verður ekki hægt að taka skjáskot af myndunum, að minnsta kosti ekki í símum frá Android fyrst um sinn.