Getur skákað heimsþekktum rithöfundum –12 milljónir seldar
Fimmtudaginn 22. júní var Blóðdropinn, íslensku glæpasagnaverðlaunin veitt í ellefta sinn. Það er Hið íslenska glæpafélag sem veitir verðlaunin. Sigurvegarinn er Arnaldur Indriðason fyrir bók sína Petsamo sem kom út hjá Forlaginu árið 2016. Þetta er í annað skiptið sem Arnaldur hlýtur verðlaunin.
Petsamo er þriðja bók Arnaldar í seríunni um lögreglumennina Flóvent og Thorsson. Hinar eru Skuggasund (2013) og Þýska húsið (2015). Sagan gerist árið 1943 í Reykjavík og fjallar um atburði sem gerast eftir að lík rekur á fjörur í Nauthólsvík.
Í fyrsta sinn var tilnefnt til verðlaunanna, en áður voru allar íslenskar glæpasögur gjaldgengar. Auk Arnalds hlutu eftirfarandi rithöfundar tilnefningu: Jónína Leósdóttir (Konan í blokkinni), Lilja Sigurðardóttir (Netið), Ragnar Jónasson (Drungi) og Yrsa Sigurðardóttir (Aflausn).
Sú glæpasaga sem hlýtur Blóðdropann er sjálfkrafa einnig tilnefnd til Glerlykilsins, norrænu glæpasagnaverðlaunanna. Arnaldur hefur tvisvar unnið þau verðlaun, árin 2002 (Mýrin) og 2003 (Grafarþögn). Auk hans hafa heimsþekktir rithöfundar á borð við Stieg Larsson, Jo Nesbö, Henning Mankell og Jussi Adler-Olsen hlotið verðlaunin. Ef Arnaldur vinnur verður hann sigursælasti rithöfundur Glerlykilsins.
Arnaldur er í dag vinsælasti rithöfundur Íslands. Hann hefur skrifað 20 glæpasögur á jafnmörgum árum. Þær hafa selst í 12 milljónum eintaka og verið þýddar á u.þ.b. 40 tungumál.
With the awesome royalty of #Iceland crimefiction @YrsaSig and #arnaldurindridason celebrating Arnaldur's awards. pic.twitter.com/r1I3auaG7H
— Lilja Sigurdardottir (@lilja1972) June 22, 2017
2007: Stefán Máni – Skipið
2008: Arnaldur Indriðason – Harðskafi
2009: Ævar Örn Jósepsson – Land tækifæranna
2010: Helgi Ingólfsson – Þegar kóngur kom
2011: Yrsa Sigurðardóttir – Ég man þig
2012: Sigurjón Pálsson – Klækir
2013: Stefán Máni – Húsið
2014: Stefán Máni – Grimmd
2015: Yrsa Sigurðardóttir – DNA
2016: Óskar Guðmundsson – Hilma
2017: Arnarldur Indriðason – Petsamo