Flúði svo undan lögreglu og ók aftan á bifreið nokkru síðar
Hæstiréttur hefur staðfest úrskurð Héraðsdóms Reykjaness þess efnis að karlmaður, sem grunaður er um að hafa framið vopnað rán í apóteki í Garðabæ þann 18. apríl síðastliðinn, sæti gæsluvarðhaldi allt til 11. júlí næstkomandi.
Maðurinn er grunaður um að hafa framið ránið vopnaður öxi og í kjölfarið reynt að flýja undan lögreglu í bifreið. Að sögn lögreglu raskaði hann umferðaröryggi og stefndi lífi fólks í augljósa hættu.
Í úrskurði héraðsdóms er vísað í skýrslu af vitni, starfsmanni apóteksins, sem sagði að maðurinn hefði komið inn fyrir afgreiðsluborðið og í sömu andrá dregið fram öxi úr frakkavasa sínum og síðan reist hana á loft. Hann hafi svo staðið einum metra frá umræddum starfsmanni með öxina á lofti og sagt: „Ég vil fá töflurnar mínar, þú veist hvað ég vil.“
Starfsmaðurinn benti manninum í kjölfarið að lyfjunum og náði að komast út úr versluninni. Önnur vitni gáfu sömu lýsingu, að maðurinn hefði verið vopnaður öxi og ógnað starfsmanni með henni. Lýsingar á fatnaði og útlit komu heim og saman við manninn er hann var hann handtekinn. Þegar lögregla hafði hendur í hári hans fann lögregla öxi í bifreiðinni og tvo hnífa, ásamt nokkuð miklu magni af lyfjum.
Þá er haft eftir öðru vitni að bifreiðinni, sem maðurinn er sagður hafa flúið í, hafi verið ekið á 80 til 90 kílómetra hraða yfir gatnamót á rauðu ljósi. Vitnið taldi með ólíkindum að bifreiðin hafi sloppið í gegnum gatnamótin án þess að lenda í árekstri miðað við þá umferð sem var á þeim tíma. Lögregla veitti manninum eftirför í töluverðan tíma, en eftirförinni lauk ekki fyrr en maðurinn ók aftan á aðra bifreið og þurfti ökumaður hennar að leita sér aðhlynningar á slysadeild.
Í greinargerð lögreglu kemur fram að meint brot mannsins varði allt að 10 ára fangelsi.