Stuttbuxur bannaðar – Hitabylgja í Evrópu
Drengir í ISCA skólanum í Exeter á suðvesturströnd Englands mættu í pilsum í skólann til að mótmæla stefnu skólans varðandi klæðaburð nemenda. Samkvæmt relgum skólans verða yngri drengir að klæðast síðbuxum og skóm en eldri drengir eru auk þess skikkaðir til þess að klæðast jökkum. Stuttbuxur og sandalar eru bannaðir í skólanum sem er blandaður fyrir börn á aldrinum 11-16 ára.
Á miðvikudaginn mættu 5 pilsklæddir drengir í skólann en á fimmtudaginn 50 drengir. Flestir fengu lánuð pils hjá skólasystrum sínum, enda voru öll pilsin löglegur skólabúningur ISCA. Einhverjir drengjanna komust samt í klandur og voru settir í einangrun vegna þessa. Einum nemanda var t.d. tjáð að pilsið sem hann klæddist væri of stutt. Öðrum var sagt að skipta um föt vegna þess að leggir hans væru of loðnir. Nokkrir drengir brugðu því á það ráð að raka leggi sína.
Í viðtali við héraðsblaðið Devonlive segir Claire Reeves, móðir eins drengsins: „Stúlkur fá að vera í pilsi allt árið um kring þannig að ég tel það algerlega ósanngjarnt að drengirnir fái ekki að klæðast stuttbuxum.“ Jafnframt sagðist hún hafa miklar áhyggjur af syni sínum í hitanum, en hitabylgja hefur riðið yfir suðurhluta Bretlandseyja að undanförnu.
En mótmæli drengjanna snúast ekki einvörðungu um fatnaðinn sjálfan, heldur óréttlætið og fastheldnina sem skólayfirvöld sýna. Þeir vilja láta taka mark á sér. Sumum drengjanna finnst uppátækið einnig sniðugt og þægilegt. Þeim finnst gott að láta lofta vel um leggina á heitum sumardegi.
Drengirnir hafa fengið mjög jákvæð viðbrögð við mótmælunum á samfélagsmiðlum og í fjölmiðlum. Þau gætu líka haft raunveruleg áhrif því að Aimee Mitchell yfirkennari í ISCA sagði að reglur varðandi klæðnað nemenda yrðu endurskoðaðar í kjölfarið. Þó ekki án samráðs við nemendur og fjölskyldur þeirra.