Þann 10. júní hvarf fjögurra ára drengur frá fjölskyldu sinni þegar hún var í útilegu í skógi nærri Úralfjöllum í Rússlandi. Í skóginum er mikill fjöldi bjarna og annarra dýra og töldu flestir að drengurinn myndi aldrei finnast á lífi. En fjórum dögum eftir að hann týndist fannst hann á lífi eftir umfangsmikla leit sem 500 manns tóku þátt í.

Telegraph skýrir frá þessu. Þar segir að drengurinn, Dmitry Peskov, hafi verið að leita að eldivið með föður sínum þegar hann varð þreyttur og spurði hvort hann mætti fara aftur í tjald þeirra sem var í um 100 metra fjarlægð.
Faðirinn leyfði honum það en það liðu sem sagt fjórir dagar áður en hann sá son sinn aftur.

Dmitry fannst 14. júní í mýrlendi en þá voru um 500 manns, aðallega sjálfboðaliðar, við leit. Fundarstaðurinn er marga kílómetra frá staðnum þar sem fjölskyldan hafði tjaldað.

Dmitry neitaði í fyrstu að tala en síðan kom í ljós að hann hafði borðað gras og drukkið úr pollum til að lifa af. Á meðan á leitinni stóð fundu leitarmenn mörg nýleg spor eftir birni og því var óttast að Dmitry hefði orðið björnum að bráð.

Dmitry var fluttur með þyrlu á næsta sjúkrahús en hann var með sár og þjáðist af vökvaskorti.