Stórslasaður og í lífshættu í Bónus: 112 svaraði ekki - „Það lá mannslíf við“

Vakt Neyðarlínunnar var keyrð á lágmarksmönnun vegna veikinda og sumarleyfa

Maður á níræðisaldri lenti í skelfilegu slysi um síðustu helgi í annarri af verslunum Bónuss á Akureyri. Hann féll aftur fyrir sig með þeim afleiðingum að hann slasaðist illa á höfði og vankaðist. Starfsmaður verslunarinnar freistaði þess að hringja á Neyðarlínuna úr tveimur mismunandi númerum, þrisvar sinnum alls, en enginn svaraði. Hann náði loks inn í fjórðu tilraun en þá voru liðnar rúmlega sjö mínútur frá því að hann reyndi fyrst að hringja. „Það var keyrt á lágmarksmönnun þessa vakt út af veikindum og sumarleyfum,“ segir aðstoðarframkvæmdastjóri Neyðarlínunnar og játar að þjónustan hafi verið léleg.

„Ég er enn að reyna að gleyma hljóðinu“

Atvikið átti sér stað síðastliðinn laugardag, 10. júní. Maðurinn, sem eins og áður segir er á níræðisaldri, var á leið út úr versluninni. Hann stóð of lengi í dyragættinni með þeim afleiðingum að skynjarar hurðarinnar námu hann ekki og hurðin lokaðist á hann. Maðurinn féll þá aftur fyrir sig til jarðar og rak höfuðið harkalega í gólfið. „Ég er enn að reyna að gleyma hljóðinu sem heyrðist þegar höfuð hans skall í jörðina. Það var hrikalegt,“ segir starfsmaður verslunarkeðjunnar, sem ekki vill láta nafns síns getið.

Þegar hann kom að lá maðurinn meðvitundarlaus á gólfinu og hafði stór blóðpollur myndast undir höfði hans. „Ég greip í ofboði til símans og hringdi tvisvar í 112 – Neyðarlínuna. Í bæði skiptin hringdi út,“ segir starfsmaðurinn. Honum var, eðli málsins samkvæmt, verulega brugðið við að enginn skyldi svara. „Viðskiptavinur benti mér þá á að prófa að hringja úr skrifstofusímanum sem ég og gerði. Það hringdi út í fyrstu tilraun en síðan náði ég loks inn í fjórða skiptið,“ segir starfsmaðurinn. Í millitíðinni var hringt beint í síma slökkviliðsins sem sendi sjúkrabíl strax á vettvang. „Mér var verulega brugðið yfir þessu. Maður gerir bara ráð fyrir því að 112 svari. Það er eitt að þjónustan sé léleg en þetta var einfaldlega hættulega lélegt. Það lá mannslíf við og vonandi bæta þeir úr þessu tafarlaust,“ segir starfsmaðurinn. Hann er einnig ósáttur við viðbrögð starfsmanns Neyðarlínunnar þegar hann loks náði sambandi en hann var, að sögn starfsmannsins, hálf dónalegur í símann.

Allt fór þó vel að lokum og kom dóttir mannsins í verslunina tveimur dögum síðar og þakkaði fyrir skjót viðbrögð. „Faðir hennar þurfti að dvelja eina nótt á spítala en er á batavegi. Mér létti gífurlega að heyra það og bað fyrir kæra kveðju,“ segir starfsmaðurinn.

Vaktin keyrð á lágmarksmönnun

Tómas Gíslason, aðstoðarframkvæmdastjóri Neyðarlínunnar, staðfestir atburðarásina í skriflegu svari til DV. „Það er tilfellið að þessi tvö símanúmer fá afskaplega slaka þjónustu þarna,“ segir Tómas. Hann upplýsir blaðamann um að símtöl starfsmannsins úr farsímanum hafi slitnað eftir 90 sekúndur en landlínusímtalið slitni eftir styttri tíma eða 60 sekúndur. „Hann þarf síðan að bíða í 44 sekúndur eftir að svarað er í fjórða skiptið,“ segir Tómas.

Að hans sögn var þessi tiltekna vakt keyrð á lágmarksmönnun, þremur neyðarvörðum, sökum sumarleyfa og veikinda. „Tilviljun raðar málum þannig að þennan klukkutíma voru símtölin óvenju löng eða að meðaltali 100 sekúndur hvert símtal. Vegna fjölda símtala varð heildartími rúm klukkustund sem dreifist á þessa þrjá,“ segir Tómas. Hann segir að um óheppni hafi verið að ræða því að á þessari sömu klukkustund hafi verið fimm hringingar sem ekki náðist að svara áður en samband slitnar eða skellt er á. „Þar af eru þessi þrjú tilteknu símtöl,“ segir Tómas. Hann tekur sem dæmi að þriðja hringingin hafi verið klukkan 16:27:25 en síðan var fjórða hringingin 16:31:21 þennan dag. „Ef að hringt hefði verið 16:27:30 hefði þetta verið eina símtalið í biðröðinni og eins milli 16:29 og 16:30,“ segir Tómas.

Að hans sögn geti slíkir toppar alltaf myndast og þá sé lykilatriði að bíða rólegur, láta hringja út og hringja svo aftur. Að hringja úr mörgum símum á sama tíma eykur ekki líkurnar á hraðari svörun heldur eykur aðeins streitu neyðarvarða. „Sem verða þá kannski stuttaralegri við þá sem þeir eru þá þegar að þjóna,“ segir Tómas.

Viltu lesa meira? Þú getur strax lesið þessa grein og aðrar í heild sinni hér á DV.is með því að ýta á „Sjá meira“ og nýta þér hagstæða áskriftartilboð frá aðeins 928 kr. á mánuði.
Sjá meira »
Gleymt lykilorð?
Auglýsing

Athugasemdir

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.