Maðurinn sem ók á hóp fólks fyrir mosku í London í gærkvöldi sagðist vilja „drepa alla múslima“ áður en hópur fólks handsamaði hann. Maðurinn, sem er 48 ára, er einnig sagður hafa hrópað að hann myndi endurtaka leikinn ef hann gæti.

Einn lést og tíu slösuðust þegar maðurinn ók litlum flutningabíl á fólk við mosku í Finsbury Park í gærkvöldi og segir lögregla að árásin beri öll þess merki að hafa verið hryðjuverk.

Að sögn breska blaðsins Guardian reyndi ímam moskunnar að halda hlífiskildi yfir manninum eftir atvikið. Að sögn sjónarvotta gerðu vegfarendur aðsúg að manninum og gerðu sig líklega til að ráðast á hann, en ímaminn er sagður hafa skipað fólki að stoppa. Lögreglu- og sjúkrabílar komu á vettvang skömmu síðar.

Að sögn lögreglu er talið að árásarmaðurinn, sem var hvítur á hörund, hafi verið einn að verki. Lögregla rannsakar hvort um einhverskonar hefndarárás hafi verið að ræða vegna nýlegra atburða í Bretlandi, London og Manchester.