Staðfest hefur verið að 62 hafa látist í miklum skógareldum í Portúgal. Flestir hinna látnu brunnu til bana í bílum sínum þegar þeir voru að reyna að flýja eldana. António Costa, forsætisráðherra landsins, segir að skógareldarnir séu mesti harmleikur sögunnar í landinu.
Costa skoðaði hamfarasvæðið í gær og sagði að því loknu að hér væri um einn mesta mannlega harmleik sögunnar í Portúgal að ræða, að minnsta kosti ræki fólk ekki minni til skelfilegri atburða. Þriggja daga þjóðarsorg hefur verið lýst yfir í Portúgal.
Auk þeirra 62 sem eru látnir þá er vitað að 60 hafa slasast, þar af fjórir slökkviliðsmenn og eitt barn. Fimm af þeim slösuðu eru sagðir í lífshættu.
Eldarnir loga nærri bænum Pedrógão Grande í Leiria-héraðinu en það er um 200 km norðaustan við Lissabon. Eldurinn braust út síðdegis á laugardaginn en lögreglan telur að eldingu hafi slegið niður í tré og þá hafi eldur blossað upp.
Um 700 slökkviliðsmenn berjast nú við eldana og hafa 215 slökkvibíla, þyrlur og flugvélar til afnota í baráttunni. Frakkland og Spánn hafa sent sérútbúnar slökkviflugvélar til Portúgal til aðstoðar.
Mjög heitt er í Portúgal og hefur hitinn víða verið rúmlega 40 gráður en það er óvenjulega heitt á þessum árstíma.