Eygló reisir burstabæ með torfþaki fyrir fjölskylduna

Gamall draumur að rætast - Óbilandi bjartsýni einkennir allt ferlið

Hefur staðið í ströngu undanfarna mánuði við að byggja hús fyrir fjölskylduna.
Eygló Harðardóttir Hefur staðið í ströngu undanfarna mánuði við að byggja hús fyrir fjölskylduna.
Mynd: DV ehf / Sigtryggur Ari

Eygló Harðardóttir, fyrrverandi félags- og húsnæðismálaráðherra, hefur staðið í ströngu undanfarna mánuði ásamt fjölskyldu sinni. Þau eru að byggja sér einbýlishús í Mosfellsbæ en fyrsta skóflustungan var tekin þann 10. apríl síðastliðinn. Fjölskyldan ráðgerir að flytja inn í október í nokkuð hrátt hús en hyggst svo klára verkið smátt og smátt. „Við vildum gjarnan prófa að byggja okkar eigið hús og hafa það eftir okkar höfði. Í ráðherratíð minni voru margir sem sögðu mér að það væri ekki hægt að byggja eigið hús lengur, að minnsta kosti ekki á stuttum tíma og það væri alls ekki hagkvæmt. Við vildum gjarnan reyna það á eigin skinni,“ segir Eygló glettin.

Að hennar sögn hefur gríðarleg bjartsýni einkennt allt ferlið en oft hafi þó hjónin horfst í augu og velt fyrir sér út í hvað þau hafi komið sér. „Maður fer líklega ekki út í svona verkefni nema með óbilandi bjartsýni að leiðarljósi. Við erum búin að gera mikið sjálf undir vökulu auga fagaðila. Það hefur verið afar gefandi en vissulega líka tekið verulega á,“ segir Eygló og hlær. Vinir og vandamenn hafa fylgst vel með framkvæmdinni á Facebook og gefið ráð við steypubruna og öðrum kvillum sem framtakssamt fólk þarf að glíma við.

Gamall draumur að rætast

Húsið sem fjölskyldan er að reisa gæti ekki verið í meiri framsóknaranda. Um er að ræða burstabæ með torfþaki. „Það má segja að gamall draumur sé að rætast. Við keyptum forsmíðaðar timbureiningar sem koma til landsins í lok mánaðarins. Við erum núna að samhæfa öll þau verkefni sem eru framundan. Það er heilmikil vinna og við þurfum að vera undir það búin að áætlanir riðlist. Ef allt gengur upp ætti húsið að vera risið tveimur vikum eftir að einingarnar koma til landsins,“ segir Eygló. Jóhann Sigurðsson, arkitekt hjá Tendra, hjálpaði þeim við að hámarka nýtingu rýmis í húsinu. „Jóhann sérhæfir sig í því og hefur reynst okkur afar vel. Við reynum að lágmarka rými sem fer í ganga í húsinu, verðum með rennihurðir til að spara pláss og vörumst að herbergin séu óþarflega stór,“ segir Eygló og kveðst afar ánægð með þá iðnaðarmenn sem hafa lagt hönd á plóg við verkið.

Sem húsnæðismálaráðherra þurfti Eygló að glíma við og vinna í endurbótum á lagaumhverfi málaflokksins og því er fróðlegt að heyra hvort eitthvað í húsbyggingarferlinu hafi komið henni á óvart. „Hönnunar- og skipulagsferlið tók mun lengri tíma en við ætluðum en sérfræðingar voru reyndar búnir að vara okkur við því. Það liðu níu mánuðir frá því að við keyptum lóðina og þar til við fengum byggingarleyfið. Ég mun seint gleyma bunkanum af teikningum sem þurfti að skila inn til að fá leyfið,“ segir Eygló.

Tekur 2–3 ár að byggja hús

Lærdómurinn sem hún dregur af ferlinu er sá að tíminn sem tekur að byggja hús sé vanmetinn. „Fólk sem starfar í þessum geira segir einfaldlega að það taki 2–3 ár að ljúka við byggingu á húsi frá því að hugmynd kviknar þar til fólk fær lyklana afhenta. Það var mjög lítið byggt af íbúðarhúsnæði árið 2015 þar sem áherslan var frekar á að byggja hótel. Smíði íbúðabygginga hófst ekki að ráði fyrr en 2016 og því verða þær íbúðir ekki komnar á markað fyrr en í fyrsta lagi 2018. Við þurfum að átta okkur á þessum biðtíma og sjá til þess að það sé stöðugt flæði af nýjum íbúðum inn á markaðinn. Til þess mega ekki bara stærri verktakar sjá um uppbygginguna heldur líka minni verktakar og einstaklingar til að tryggja fjölbreytnina og framboðið. Sveitarfélög verða að taka tillit til þessa í áætlunum sínum og framboði af lóðum,“ segir Eygló.

Aðspurð hvort hún hafi rekið sig á eitthvað sem þarfnast endurskoðunar varðandi lög og reglur segir Eygló: „Í tíð síðustu ríkisstjórnar vann umhverfisráðherra mikið í að reyna að einfalda byggingarreglugerðina og auka sveigjanleika. Það er margt í skipulagsferlinu sjálfu hjá sveitarfélögunum sem þarf að athuga, til dæmis hvað það tekur langan tíma að gera breytingar á skipulagi og sífellt auknar kröfur til húsbyggjenda í deiliskipulagi. Þar má nefna stærðarkröfur, efnisval, frágang og fleira. Þá hafa yfirvöld úthýst eftirliti með framkvæmdum með byggingarstjórafyrirkomulaginu, sem virðist að miklu leyti snúa að því að það séu til staðar tryggingar til að bæta hugsanlega skaða. Ég held að það þyrfti að skoða vandlega hvort það hafi verið rétt ákvörðun á sínum tíma að sveitarfélögin úthýsi eftirliti með þessum hætti,“ segir Eygló.

Þá telur hún mikilvægt að gera fólki kleift að byggja í áföngum, en núverandi fyrirkomulag húsnæðislána og úttekta gerir það mjög erfitt. „Við hefðum gjarnan viljað byggja húsið okkar í áföngum, eins og gert var í Smáíbúðahverfinu á árum áður. Að mínu mati ætti að leyfa fólki að byggja 50–80 fermetra hús og stækka þau svo smátt og smátt í takt við fjölskyldustærð og efnahag,“ segir Eygló.

Athugasemdir

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.