Tveir „valinkunnir einstaklingar“ gáfu Róbert Árna Hreiðarssyni vottorð um góða hegðun.
Þorleifur Óskarsson, upplýsingafulltrúi Innanríkisráðuneytisins, segir í samtali við DV að verið sé að vinna í því að upplýsa fjölmiðla um mál Róberts Árna Hreiðarssonar, eða Robert Downey líkt og hann kallar sig í dag.
Þorleifur segir að þær upplýsingar verði ekki tilbúnar fyrir en í fyrsta lagi á mánudaginn. DV sóttist eftir að fá upplýsingar um hverjir hafi vottað um góða hegðun Róberts. Bergur Þór Ingólfsson, leikari og faðir einnar af þeim stúlkum sem Róbert Árni misnotaði, sagði í viðtali við Rás 2 í morgun að hann vildi vita hverjir hafi gert það.
„Ég veit ekki hvað við getum gert en það sem ég vil fá að vita er hvaða valinkunnu einstaklingar eru á vottorðinu sem fer í dómsmálaráðuneytið, hvernig þetta var unnið og hver rökin eru í dómsmálaráðuneytinu á sínum tíma fyrir því að hann fái uppreist æru,“ sagði Bergur.
Jón Steinar Gunnlaugsson, verjandi Róberts, segir í samtali við DV að hann sé ekki meðal þeirra sem hafi vottað um góða hegðun hans. Jón Steinar vildi ekki gefa upp nöfn einstaklinganna.