Bláa lónið hagnaðist um 2.650 milljónir

Hagnaður Bláa lónsins eftir skatta árið 2016 nam 23,5 milljónum evra, 2.650 milljónum króna á núverandi gengi. Þetta kemur fram í tilkynningu frá Bláa lóninu. Veltan á síðasta ári nam 77,2 milljónum evra.

Í tilkynningunni kemur fram að eiginfjárhlutfall fyrirtækisins á síðasta ári hafi verið 49 prósent og handbært fé frá rekstri var 28,1 milljón evra.

„Vöxtur í starfsemi Bláa Lónsins hélt áfram á síðasta ári. Áhersla á fjárfestingar í gæðum og upplifun gesta hefur borið góðan árangur eins og greina má af rekstri félagsins árið 2016. Öflug og virk aðgangsstýring hefur m.a. leikið lykilhlutverk í því efni,“ segir Grímur Sæmundsen, forstjóri Bláa lónsins, í tilkynningunni.

Grímur segir að nú starfi í kringum 600 manns hjá Bláa lóninu og ljóst sé að þeim muni fjölga umtalsvert á næstunni. Er það einkum vegna þess að unnið er að áframhaldandi uppliffun sem felst í stækkun á upplifunarsvæði Bláa lónsins og nýju hóteli við lónið.

Athugasemdir

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.