Lögreglan á höfuðborgarsvæðinu mun á mánudag byrja að fylgjast sérstaklega með notkun nagladekkja og sekta þá sem ekki hafa skipt yfir á naglalaus dekk. Nú þegar maímánuður er genginn í garð eru nagladekk farin að verða óþarfur búnaður á höfuðborgarsvæðinu.
Í tilkynningu sem lögreglan sendi frá sér á fimmtudag var minnt á að sekt fyrir hvert nagladekk nemur fimm þúsund krónum. Þá minnti lögreglan á að sama sekt er fyrir notkun á óhæfum hjólbörðum og því skiptir máli að vera á góðum dekkjum. Ökumenn, sem þess þurfa, eru því hvattir til að gera viðeigandi ráðstafanir og skipta út nagladekkjum ökutækja sinna til að forðast óþarfa kostnað vegna sekta. „Þar að auki felst í því yndisauki að losna við glamrið sem fylgir nagladekkjum,“ segir lögreglan.