Lögreglumenn hjá lögreglunni á Vesturlandi höfðu afskipti af erlendum ferðamönnum í vikunni. Í dagbók lögreglu kemur fram að lögreglumenn hafi verið á leið í verkefni á Snæfellsnesi þegar þeir komu að ferðamönnunum að mynda hrossastóð með dróna. Voru hestarnir á hlaupum undan drónanum. „Gátu lögreglumennirnir ekki annað en stoppað hjá fólkinu og gert þeim grein fyrir því að þessi háttsemi væri ekki í lagi. Lofuðu ferðamennirnir öllu fögru og sögðust ekki hafa gert sér grein fyrir því að þetta væri bannað,“ segir lögreglan á Vesturlandi.