Peter Sutcliffe var sakfelldur fyrir að myrða þrettán konur
Sænsk lögregluyfirvöld, í samvinnu við kollega sína í Bretlandi, skoða nú hvort Peter Sutcliffe, einn alræmdasti fjöldamorðingi í sögu Bretlands, hafi einnig myrt tvær konur í Svíþjóð árið 1980. Sutcliffe er stundum kallaður Yorkshire-kviðristan en hann var dæmdur í lífstíðarfangelsi snemma á níunda áratugnum fyrir að myrða þrettán konur og reyna að myrða sjö til viðbótar.
Kvallsposten greindi frá þessari hugsanlegu tengingu á dögunum, en málið varðar óleyst morð á tveimur konum sem fundust, annars vegar í Gautaborg og hins vegar í Malmö, síðsumars 1980. Lík beggja kvennanna fundust á byggingasvæðum í borgunum.
Ástæða þess að Peter er til sérstakrar skoðunar er sú að hann var, að því er virðist, í Svíþjóð á þessum tíma. Vísað er í lista yfir farþega í ferju einni í nágrenni við Malmö en þar má finna nafn Peters á þeim tíma sem talið er að seinni konan hafi verið myrt. Hár sem fannst á líkama hennar var tekið til varðveislu og mun DNA-rannsókn leiða það í ljós hvort Peter hafi verið að verki eða einhver annar.
Peter var dæmdur í tuttugufalt lífstíðarfangelsi á sínum tíma og afplánar hann nú þann dóm.