Pilturinn var dæmdur í þriggja mánaða skilorðsbundið fangelsi.
Piltur fæddur árið 1997 hefur verið dæmdur í þriggja mánaða skilorðsbundið fangelsi fyrir að hafa flutt til Íslands 208 stykki af MDMA í pakkasendingu frá Hollandi.
Í dómi hans kemur fram að tollverðir fundu sendinguna við eftirlit í póstmiðstöðinni við Stórhöfða í Reykjavík. Lögregla skipti fíkniefnunum út fyrir gerviefni. Pilturinn var handtekinn þegar hann sótti sendinguna á pósthúsið í Mjódd þann 20. október síðastliðinn.
Pilturinn var auk þessa dæmdur fyrir að hafa í vörslu sinni bitvopn með blaði lengra en 12 cm og ríflega eitt gramm af kannabis. Hann játaði brot sín og hefur ekki áður gerst sekur um refsiverð brot. Héraðsdómur Suðurlands dæmdi í málinu á dögunum.