Rannsókn lögreglu á hryðjuverkinu í Manchester á mánudagskvöld, þar sem Salman Abedi sprengdi sig í loft upp, beinist meðal annars að því að varpa ljósi á ferðir hans áður en hann lét til skarar skríða. Breskir fjölmiðlar greina nú frá því að Salman hafi verið í Dusseldorf nokkrum dögum áður en hann framdi voðaverkið.

Skoða hugsanleg tengsl

Vitað er að ófáir öfgafullir íslamistar hafa hafist við í Dusseldorf á undanförnum árum. Þannig sótti Anis Amri, hryðjuverkamaðurinn sem ók á hóp fólks á jólamarkaði í Berlín í desember, mosku í borginni. Eins og Abedi hafði Amri tengsl við Líbíu en báðir voru fæddir þar. Talið er að Amri hafi verið í samskiptum við hryðjuverkamenn í Líbíu áður en hann ók á fólkið.

Ekki liggur fyrir hvort mennirnir hafi þekkst eða hvort tengsl séu á milli árásanna, en rannsókn lögreglu beinist meðal annars að því. Eitt af því sem rennir stoðum undir tengslin er sú staðreynd að sama sprengiefni virðist hafa verið notað af Salman á mánudagskvöld og hryðjuverkamennirnir í París og Brussel notuðu á sínum tíma. Þetta var fullrt í frétt á vef Guardian í morgun.

Faðirinn óbeinn stuðningsmaður Al-Qaeda

Ein kenning er sú að Abedi hafi verið meðlimur í neti öfgafullra íslamista í Þýskalandi, neti sem Mohamed Abrini, einn af hugmyndasmiðunum á bak við voðaverkin í París og Brussel, var einnig meðlimur í.

Faðir Abedi, Ramadan, og yngri bróðir hans, Hashem, eru í haldi lögreglunnar í Líbíu vegna gruns um að hafa haft vitneskju um að voðaverkið í Manchester væri yfirvofandi. Ramadan er sagður hafa verið yfirlýstur stuðningsmaður samtaka sem hafa heitið Al-Qaeda hollustu sína. Þá var eldri bróðir Abedi, Ismail, handtekinn í Manchester en ekki liggur ljóst fyrir hvort hann hafi haft einhverja vitneskju um að árás væri yfirvofandi.

Focus-tímaritið í Þýskalandi sagði í morgun að Abedi hefði ekki verið undir smásjá neinna yfirvalda í Evrópu og því hafi hann átt auðvelt með að ferðast milli Þýskalands og Englands. Þýska hryðjuverkalögreglan skoðar nú hvern Abedi hitti í Dusseldorf í þeirri von að hafa hendur í hári þeirra.