Skelfilegt hjólreiðaslys átti sér stað í Søborg í Danmörku í gær, þriðjudag. Talsmaður lögreglunnar sagði að erfitt væri að átta sig á hvað gerðist en hér hafi verið um harmleik án hliðstæðu að ræða. 39 ára, þaulvanur hjólreiðamaður lét lífið í slysinu.

Hjólreiðamaðurinn kom hjólandi eftir Grønnemose Allé en af óþekktum ástæðum hjólaði hann á kyrrstæðan bíl. Höfuð hans lenti á afturrúðu bílsins og hún brotnaði en maðurinn var með reiðhjólahjálm. Maðurinn er talinn hafa misst meðvitund við þetta og féll niður á brotið glerið og skarst á háls.

BT hefur eftir Lars Jørgensen, varðstjóra hjá lögreglunni í vesturhluta Kaupmannahafnar, að erfitt sé að átta sig á atburðarrásinni en hér hafi verið um harmleik án hliðstæðu að ræða.

Engin vitni voru að slysinu og því veit lögreglan ekki af hverju maðurinn hjólaði á bílinn. Eigandi bílsins heyrði þegar rúðan brotnaði og hljóp strax út og veitti reiðhjólamanninum skyndihjálp en því miður tókst ekki að bjarga lífi hans.

„Þetta er einfaldlega hræðilegt. Ég skil ekki hvernig svona getur gerst, þetta er bara eitt stórt slys.“
Sagði Lars Jørgensen.