Á öðrum tímanum í nótt var maður handtekinn við Grensásveg en hann er sagður hafa ógnað þremur ungum mönnum með skrúfjárni. Maðurinn var í annarlegu ástandi og var vistaður í fangageymslu en hann er grunaður um brot á vopnalögum, vörslu fíkniefna, hótanir og fleira.´

Skömmu síðar voru tveir menn handteknir þar sem þeir voru komnir inn á lokað athafnasvæði Eimskips í Sundahöfn. Mennirnir voru vistaðir í fangageymslu vegna rannsóknar málsins.

Um klukkan fjögur í nótt var maður handtekinn við Álagranda en þar var hann að valda ónæði. Maðurinn var í annarlegu ástandi og var vistaður í fangageymslu. Skömmu síðar datt kona við Lækjargötu og meiddist á ökkla. Hún fór úr lið. Sjúkraflutningsmenn kipptu henni aftur í lið og fluttu síðan á slysadeild.

Í gærkvöldi var maður handtekinn í heimahúsi í Grafarvogi en hann er grunaður um hótanir og eignaspjöll. Hann var vistaður í fangageymslu vegna rannsóknar málsins

Tveir ökumenn voru handteknir grunaðir um akstur undir áhrifum fíkniefna. Annar þeirra er einnig grunaður um að hafa verið með fíkniefni í fórum sínum.