Flokkur Græningja í Noregi leggur á það áherslu að ný háhraðagöng verði tekin í notkun sem myndu gera fólki kleift að ferðast milli Oslóar og Kaupmannahafnar á tæpum hálftíma.

Hugmyndin er í raun hugarsmíð frumkvöðulsins Elon Musk, stofnanda Tesla, sem vinnur að þróun svokallaðra Hyperloop-háhraðaganga. Hugmyndin er komin ágætlega á veg og eru mögulegar framkvæmdir um slík göng í Sameinuðu arabísku furstadæmunum þegar komnar á teikniborðið.

Um er að ræða byltingarkennt samgöngukerfi sem myndi gera almenningi kleift að ferðast á ógnarmiklum hraða milli staða, eða hátt í 970 kílómetra á klukkustund. Í stuttu máli mætti líkja samgöngukerfinu við lest sem komið er fyrir inn í loftþéttu röri. Sérstök tækni myndi gera vagninum kleift að ferðast á hljóðhraða inni í rörinu.

Hugmyndin þykir býsna byltingarkennd enda myndi þetta spara tíma og orku og verða auk þess umhverfisvænna en hefðbundnir samgöngumátar.

Miðað við framangreint myndi það taka fólk um það bil hálftíma að ferðast milli Los Angeles og San Francisco, en vegalengdin á milli þessara tveggja stórborga í Kaliforníu er 560 kílómetrar. Miðað við sömu forsendur myndi það taka um 29 mínútur að ferðast milli Oslóar og Kaupmannahafnar með þessum hætti.

Norska Dagbladet fjallaði um þessa hugmynd Græningja sem kynnt var á landsþingi flokksins í Lillehammer um helgina. Þar fékk hugmyndin góðan hljómgrunn og vonast forsvarsmenn flokksins að hægt yrði að taka slíka lest í notkun innan tuttugu ára, eða eigi síðar en árið 2037. Til stendur að hefja prófanir á lestinni á næstu árum og stefnt er að því að taka uppfinninguna í notkun í Sameinuðu arabísku furstadæmunum árið 2020 – að því gefnu að allt gangi vel.

„Nú þegar við sjáum að þetta er raunveruleikinn en ekki einhver græn fantasía þá teljum við rétt að stökkva á vagninn,“ segir Per Espen Stoknes í samtali við Dagbladet.