David Sullivan, eigandi enska úrvalsdeildarfélagsins West Ham, hefur boðið Stephen Jones, heimilislausum manni sem kom börnum og unglingum til aðstoðar eftir voðaverkin í Manchester á mánudagskvöld, frítt húsnæði næstu mánuði.
Stephen hefur að undanförnu hafist við í nágrenni við tónleikahallarinnar þar sem tónleikar Ariönu Grande fóru fram. Hryðjuverkamaður sprengdi sig í loft upp með þeim afleiðingum að tuttugu og tveir létust og fjölmargir slösuðust. Mikil ringulreið myndaðist í kjölfarið og kom Stephen fjölmörgum börnum til aðstoðar. Hann aðstoðaði til að mynda litla stúlku sem var með sprengjubrot í andlitinu.
Öðrum heimilislausum manni, Chris Parker, hefur verið hampað sem hetju eftir að hann kom ungri stúlku til aðstoðar. Stúlkan missti báðar fætur í sprengingunni og hafði orðið viðskila við foreldra sína. Eðlilega var hún í miklu áfalli en Chris reyndi hvað hann gat að róa hana niður þar til sjúkraflutningamenn komu á vettvang.
Sullivan, eigandi West Ham, og sonur hans hafa boðið Jones frítt leiguhúsnæði til næstu sex mánuða hið minnsta. David yngri sagði á Twitter að hann vildi komast í samband við Stephen. „Menn sem sýna svona óeigingirni þarf að verðlauna,“ sagði David en skömmu síðar tilkynnti hann að þeir feðgar væru komnir í samband við hann.
Þá hefur móðir Parkers stigið fram og sagt að hún vilji endurnýja kynnin við son sinn, en þau hafa ekki talast við svo árum skiptir. Jessica, móðir hans, sagði í viðtali við Manchester Evening News að hún hefði séð mynd af syni sínum á Facebook eftir voðaverkin. Þegar hún las hvað sonur hennar hefði gert hefði hún fyllst stolti. Bætti hún við að hún hefði ekki haft hugmynd um að sonur hennar væri heimilislaus. Þau hefðu ekki talast við lengi og sagði hún í samtali við blaðið að hún myndi gera allt sem í hennar valdi stæði til að koma syni sínum af götunni.