Segja að um sjálfsvígsárás hafi verið að ræða
Lögreglan í Manchester hefur nú staðfest að 19 hafi látist og 60 séu særðir eftir sprenginguna við Manchester Arena í gærkvöldi. Þar var tónleikum Ariana Grande nýlokið og voru tónleikagestir á leið út þegar hár hvellur heyrðist, sprenging. Á myndbandsupptökum má sjá að mikil skelfing greip um sig meðal tónleikagesta.
Lögreglan hefur ekki enn staðfest orsakir sprengingarinnar en CNN segir að samkvæmt upplýsingum frá heimildarmönnum hjá bandarískum leyniþjónustum þá hafi verið um sjálfsvígssprengjuárás að ræða og að búið sé að bera kennsl á árásarmanninn. Lögreglan í Manchester hefur aðeins staðfest að málið sé rannsakað sem hryðjuverk.
60 sjúkrabílar og tugir lögreglumanna voru sendir á vettvang þegar tilkynning barst um sprenginguna klukkan 22.33 að staðartíma. Samkvæmt frétt Sky þá tekur tónleikahöllin um 22. 000 gesti og má teljast líklegt að höllin hafi verið full en tónleikar söngkonunnar Ariane Grande höfðu farið fram og var nýlokið þegar sprengjan sprakk. Þeir særðu voru fluttir á 6 sjúkrahús í Manchester og nágrenni.
Mikill fjöldi barna og unglinga var á tónleikunum en Ariane Grande er mjög vinsæl hjá yngri kynslóðinni.
Breska þjóðaröryggisráðið kemur saman til fundar klukkan 9 vegna málsins.
Engin samtök hafa lýst ábyrgð á sprengingunni á hendur sér en Sky segir að stuðningsmenn hryðjuverkasamtakanna sem kenna sig við Íslamska ríkið fari mikinn á netinu þessa stundina og gleðjist yfir sprengingunni og mannfallinu.