Það á að eyða myndböndum af misþyrmingum á dýrum ef þau dásama misþyrmingarnar. Ef myndböndin eru hins vegar notuð til að vekja athygli á vandanum eða fordæma hann þá á ekki að eyða þeim. Þetta er meðal þess sem kemur fram í reglum og starfsreglum fyrir starfsfólk Facebook.

Breska blaðið The Guardian hefur komist yfir þessi gögn og birtir þau í dag. Blaðamenn blaðsins hafa undir höndum rúmlega 100 handbækur frá Facebook um hvernig starfsfólk á að taka á hinum ýmsum málum á samfélagsvefnum. Þetta nær til dæmis yfir efni eins og ofbeldi, hatursræðu, hryðjuverk og klám.

Í leiðbeiningunum kemur til dæmis fram að Facebook vill ekki blanda sér í beinar útsendingar þegar fólk er að skaða sjálft sig. Ástæðan er að samfélagsmiðillinn „vill ekki refsa fólki í neyð“.

Á hinn bóginn á að eyða út ummælum á borð við „Someone shoot Trump“ (einhver ætti að skjóta Trump) í athugasemdakerfinu. Þetta er vegna þess að þar sem hann er forseti nýtur hann sérstakrar verndar. Á hinn bóginn er í lagi að skrifa „kick a person with red hair“ (sparkaðu í rauðhærðan).

Þegar kemur að list þá á starfsfólkið ekki að aðhafast neitt þegar um handgerð listaverk, þar sem nekt og kynlíf er sýnt, er að ræða. Á hinn bóginn á að grípa í taumana þegar um tölvugerða list, þar sem nekt og kynlíf er sýnt, er að ræða.

Facebook hefur verið undir vaxandi þrýstingi undanfarna mánuði um að grípa inn í hvað varðar hinar svokölluðu „fake news“ (upplognar fréttir), ofbeldi eða annað ósæmilegt og ólöglegt myndefni, skiptir þá engu hvort um ljósmyndir, myndbandsupptökur eða beinar útsendingar er að ræða.

Fyrir nokkrum vikum tilkynnti Facebook að 3.000 manns yrðu ráðnir til starfa hjá fyrirtækinu til að fylgjast með og meta þær milljónir ábendinga um ósæmilegt efni sem berast vikulega. Nú þegar starfa 4.500 manns við þetta.
The Guardian hefur eftir Monika Bickert, yfirmanni stefnumótunar hjá Facebook, að það sé erfitt að ná samstöðu um hvað eigi að leyfa á samfélagsmiðlinum en notendur hans eru um tveir milljarðar vikulega. Fólk hafi mismunandi skilning á hvernig efni sé í lagi að birta á samfélagsvefnum. Það skipti engu hvar mörkin liggi, það verði alltaf einhver grá svæði.