Er risastór bygging á braut um hana?
Stjörnufræðingar keppast nú við að beina sjónaukum sínum að stjörnunni KIC 8462852, einnig þekkt sem Tabby‘s stjarnan, vegna breytinga á birtustigi hennar. Fylgst hefur verið með stjörnunni um árabil vegna breytinga á birtustigi hennar en á föstudaginn urðu miklar breytingar á birtustiginu og hafa stjörnufræðingar því mikinn áhuga á að fylgjast grannt með hvað er að gerast.
Stjarnan uppgötvaðist skömmu fyrir aldamótin 1900 en það var ekki fyrr en við rannsóknir á henni á árunum 2009 til 2013 sem stjörnufræðingar uppgötvuðu að hún er mjög sérstök. Birta hennar breytist óreglulega og oft mikið. Vísindamenn hafa ekki getað fundið skýringu á hvers vegna það gerist.
Margar kenningar hafa verið settar fram um ástæður þessara undarlegu birtubreytinga, þar á meðal ein sem hljóðar upp á að risastór bygging sé á braut um stjörnuna. Þessi bygging væri þá verk vitsmunavera utan Jarðarinnar og væri hún notuð til að sækja orku í stjörnuna. Kenningar hafa verið settar fram um að þróuð samfélög vitsmunavera muni á einhverjum tímapunkti sækja þá orku sem þau þarfnast beint í sólir sínar (stjörnur).
Tabby‘s stjarnan er nefnd eftir Tabetha Boyajian, stjörnufræðingi í Louisiana, sem veitti því athygli að birtustig stjörnunnar minnkaði um 22 prósent eitt sinn en það hafa vísindamenn ekki getað skýrt með núverandi vitneskju okkar um alheiminn.
Sky-fréttastofan segir að í síðasta mánuði hafi stjörnufræðingar tekið eftir því að birtustig stjörnunnar hafi virst minnka aðeins en á föstudaginn hafi þetta síðan færst í aukana. Haft er eftir Jason Wright, prófessor í stjörnufræði við Penn ríkisháskólann, að eitt stærsta vandamálið sé að stjörnusjónaukar séu yfirleitt bókaðir marga mánuði fram í tímann og því sé ekki bara hægt að hlaupa til og beina þeim strax að stjörnunni.
Tabby‘s stjarnan er í um 1.275 ljósára fjarlægð frá Jörðinni.
Stjörnufræðingar telja að breytingarnar á birtustiginu geti ekki verið vegna þess að pláneta fari framhjá henni því það myndi ekki valda svo miklum breytingum á birtustiginu og auðveldara væri að reikna út hvenær það gerist. Einnig hefur verið sett fram kenning um að stór ský úr ryki og geimrusli sé í kringum stjörnuna, önnur hljóðar upp á að pláneta hafi rekist á hana og enn önnur að loftsteinar eigi hlut að máli.