Forsetadóttirin um hádegisverðinn með Ricky Gervais á Bessastöðum: „Ég froðu­felldi næstum af til­hlökk­un“

Grínistanum heimsþekkta var boðið í óformlegan hádegisverð á Bessastöðum

„Nýverið hlaut ég þann heiður að vera boðið í hádeg­is­verð á Bessa­stöðum þar sem sjálfur Ricky Gervais var gest­ur. Mig langar að taka fram að ástæða þess að mér var boðið var vegna þess að stuttu áður hafði ég verið að tala við pabba minn, sem er meðan ég man for­seti lands­ins okkar ef það hafði farið fram­hjá ein­hverj­um, um uppi­stand og hann bara svona sultu­slakur spurði mig hvort ég vildi kannski koma í óform­legan brunch með Herra Gervais og frú, þúst, bara ef mig lang­aði. Ég froðu­felldi næstum af til­hlökk­un,“ segir sálfræðineminn og forsetadóttirin Rut Guðnadóttir í pistli á Kjarnanum.

Mismunandi skilningur á hvað sé óformlegt

Segir Rut hafa rekið sig á mismunandi skilning feðginanna á hvað sé óformlegur hádegisverður. „Ég tók þessu full alvar­lega þar sem ég mætti á Bessa­staði í íþrótta­bux­um, flís­peysu og ómál­uð. Svo komst að því að „óform­legt“ þýddi sam­kvæmt föður mínum skyrta mínus bindi. Að auki var hádeg­is­verð­ur­inn ekki hald­inn í eld­hús­inu heima hjá þeim heldur í borð­stof­unni á Bessa­stöðum sjálf­um, þar sem er þjónað til borðs, þrír gafflar eru not­aðir og fullt af öðru fyndnu fólki hafði verið boð­ið, meðal ann­ars Ara Eld­járn og Sögu Garð­ars. Og ég leit út fyrir að hafa gefið skít í allt sam­an. Þegar ég benti pabba mínum á þetta allt saman og lagði höf­uð­á­herslu á að ég væri ekki einu sinni búin að setja hylj­ara yfir bólurnar mínar yppti hann bara öxlum og sagði: „Skiptir það máli?“, segir Rut.

Að hennar sögn hló hún sig máttlausa í matarboðinu þar sem Guðni forseti gerði óspart grín að uppistandaranum heimsþekkta sem svaraði í sömu mynt. Samræðurnar hafi verið fyndnar en einnig einlægar og áhugaverðar. Meðal annars hafi þau rætt í þaula hvar mörk grínsins liggja:

„Nið­ur­staðan að mínu mati er að ekk­ert sé bann­að. Við verðum að geta hlegið að því sem við gerum, sér­stak­lega til að verja okkur gegn öllu því ógeðs­lega sem mann­kynið er fært um. Af hverju leyfum við fólki að kom­ast upp með að gera ógeðs­lega hluti en fáum hland fyrir hjartað þegar við gerum grín að því?," segir Rut.

Athugasemdir

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.