Skór sem kosta 199 norskar krónur, sem jafngildir 2.400 krónum íslenskum, munu kosta 3.495 krónur hér á landi í verslunum H&M. Þetta má sjá á verðmiða verslunarrisans, en H&M mun opna sína fyrstu verslun hér á landi í Smáralind í ágústmánuði.

Fréttablaðið fjallar um þennan verðmun í dag. Fleiri dæmi eru nefnd í umfjölluninni; barnabolur sem kostar 79,90 norskar krónur, upphæð sem jafngildir 970 íslenskum krónum, kostar 1.490 krónur á Íslandi.

Þess er getið að tollar hafi verið afnumdir á fötum og skóm hér á landi.

Í svari forsvarsmanna H&M við fyrirspurn Fréttablaðsins kemur fram að í verðinu sé gert ráð fyrir utanaðkomandi aðstæðum eins og flutningskostnaði og sköttum. Fyrirtækið lofi að bjóða íslenskum neytendum besta verðið sem hægt er að bjóða.