Ólafur heldur á fund stjórnskipunar- og eftirlitsnefndar Alþingis síðar í dag
Ólafur Ólafsson hefur birt á YouTube upptöku af greinargerð sem hann hyggst flytja á fundi sínum með stjórnskipunar- og eftirlitsnefnd Alþingis í dag. Fundurinn hefst klukkan 15:15 í dag og verður hann opinn fjölmiðlum.
Ástæða þess að Ólafur birtir greinagerðina á netinu er sú að hann fær aðeins 10-15 mínútur til þess að tjá sig en hann hafði gert ráð fyrir mun lengri tíma. Upptakan sem hann birtir á Youtube er tæpur klukkutími að lengd. Hann segist virða þá ákvörðun nefndarmanna og hafi tilkynnt þeim í bréfi að greinargerðin verði birt í heild sinni fyrir fundinn. Þannig geti nefndarmenn og almenningur kynnt sé efni hennar fyrir fundinn.
Myndbandið er birt á vefnum söluferli.is. Þar segir að markmiðið sé að varpa skýrara ljósi á aðdraganda og umgjörð aðkomu þýska bankans við söluna á 45,8% hlut ríkisins í Búnaðarbankanum í ársbyrjun 2003 og að Ólafur hafi aldrei í rannsóknarferlinu fengið að sjá nein gögn til að tjá sig um né notið andmælaréttar, þrátt fyrir ítrekaðar óskir þar um.
