Spencer var byrluð e-tafla: Sjáðu læknaskýrsluna

Líklegast er að e-tafla hafi verið sett í drykk Robert Spencer, ritstjóra Jihad Watch. Læknir telur að hann hafi fengið kvíðakast.

Samkvæmt læknisskýrslu frá Landspítalanum var Robert Spencer, ritstjóra Jihad Watch, gefið MDMD og amfetamín. Spencer sendi DV afrit af læknaskýrslunni sem má sjá hér fyrir neðan. Þar kemur fram að þvagprufa hafi leitt í ljós að bæði MDMA og amfetamín hafi fundist í þvagi hans.

Læknir Landspítalans telur að einkenni Spencer hafi bent til að hann hafi fengið kvíðakast. Samkvæmt skýrslunni kveðst Spencer upplifa mikið álag vegna vinnu sinnar en hann hefur verið sakaður um fjandsamlegar alhæfingar um múslima og íslam. Hann hélt fyrirlestur á Grand Hótel í síðustu viku sem bar yfirskriftina Íslam og framtíð evrópskrar menningar. Læknir Landspítalans ráðleggur Spencer að taka því rólega og forðast streituvalda vegna vinnu sinnar.

MDMA er virka efnið í e-pillum en oft er amfetamíni blandað við töflurnar. Því er líklegast að e-tafla hafi verið sett í drykk Spencer. Á vef SÁÁ er vímu af völdum MDMA lýst svo: „Í vímunni lýsir fólk því að það finni fyrir aukinni samkennd, samúð og skilningi og aukinni þörf fyrir að hreyfa sig og dansa. Hjá næmum einstaklingum koma fram vægar ofskynjanir, hjartsláttur og höfuðverkur.“

Spencer segist í skriflegu svari við fyrirspurn DV ætla fylgja kæru sinni eftir og vonar að sá sem byrlaði honum ólyfjan verði sóttur til saka. Spurður um hvort hann hafi óttast um líf sitt svarar Spencer:

„Ég veit að ég mun deyja einn daginn og þegar það gerist veit ég líka að vinstrimenn og múslimar munu fagna.“

Spencer segist aldrei hafa heyrt af MDMA fyrr en í síðustu viku. „Ég vissi ekki hvað MDMA var. Ég fletti því upp og komst að því að þetta er alsæla, vinsælt dóp meðal ungs fólks. Ég skil ekki af hverju þetta er vinsælt, þar sem upplifun mín af þessu á Íslandi, mín eina upplifun af þessu, var ömurleg.“

Spencer leggur áherslu á að MDMA geti verið stórhættulegt. Hann segist aldrei hafa upplifað kvíða áður þrátt fyrir vinna hans sé mjög streituvaldandi. Hann bendir á að einkennin hafi verið mjög lík einkennum of stórs skammts af MDMA. Einkenni of stórs skammts eru meðal annars kvíðakast og magnleysi, líkt og Spencer fann vel á eigin skinni. Vísir greindi frá því árið 2014 að rekja mætti dauðsföll fimm íslenskra ungmenna til eiturlyfsins MDMA frá aldamótum.

Líkt og DV greindi frá fyrr í dag þá hefur lögreglan á höfuðborgarsvæðinu staðfest að Robert Spencer hafi lagt inn kæru og leitað á slysadeild. Málið væri til skoðunar en enginn hafi verið yfirheyrður að svo stöddu enda málið á algjöru frumstigi. Verið væri að safna gögnum og ákvörðun yrði tekin í framhaldi um hvort einhver fengi réttarstöðu grunaðs í málinu.

Athugasemdir

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.