Flykkjast til útlanda – Rúmlega 60 þúsund fóru til útlanda í apríl
„Það bendir allt til þess að árið í ár verði það fjölmennasta í sögu landsins í utanlandsferðum Íslendinga,“ segir í umfjöllun sem birtist á vef Greiningar Íslandsbanka á fimmtudag.
Þar var vísað í nýjar tölur frá Ferðamálastofu Íslands um brottfarir gesta um Keflavíkurflugvöll í aprílmánuði. Var mánuðurinn sá næstfjölmennasti í sögunni í brottförum Íslendinga.
Alls fóru 62.300 Íslendingar erlendis í mánuðinum en hefur aðeins einu sinni verið hærri, í EM-mánuðinum júní í fyrra þegar 67.100 Íslendingar fóru utan. Aukningin í apríl frá sama mánuði á síðasta ári er 60 prósent, en bent er á að hér gæti eðlilega einnig áhrifa páska þar sem þeir voru í apríl í ár en í mars í fyrra.
„Það sem af er ári eru brottfarir Íslendinga komnar upp í 175.500 talsins, sem er 27 prósenta aukning frá sama tímabili í fyrra. Hafa brottfarir Íslendinga aldrei verið fleiri á fyrstu 4 mánuðum ársins en í ár, og sem hlutfall af mannfjölda er það komið upp í 52 prósent,“ segir á vef Greiningar.
Þá er bent á að alls hafi rúmlega 153 þúsund erlendir ferðamenn farið frá landinu um Keflavíkurflugvöll í aprílmánuði. Er hér um að ræða fjölgun upp á 58.700 ferðamenn á milli ára, eða sem nemur 62 prósentum. „Líkt og undanfarið munar hér mestu um fjölgun á ferðamönnum frá Bandaríkjunum, sem voru 40.400 talsins í apríl og tvöfalt fleiri en þeir voru í apríl í fyrra. Er fjöldi erlendra ferðamanna nú kominn upp í 605.700 sem er fjölgun upp á 56 prósent frá sama tímabili í fyrra.“