Norska ríkið hyggst byggja 1,7 km löng göng fyrir skip, sem verða þau fyrstu sinnar tegundar í heiminum. Áætluð opnun ganganna er 2023, en um þetta er fjallað á vef Independent.

Göngin munu liggja á milli tveggja lítilla fjarða innst á skaganum Stadtlandet suðvestanvert í Noregi. Strandlengjan er ögrum skorin og því er mikið stuðst við siglingar á þessu svæði, bæði í samgöngum og flutningum.

Skip þurfa nú að sigla langar hjáleiðir til að komast ferða sinna á milli mismunandi borga. 75 km sigling er frá upphafi fyrirhugaðra ganga og til enda þeirra, sé siglt umhverfis allan skagann. En á meðan eru göngin eru aðeins tæpir tveir kílómetrar á lengd. Þessi framkvæmd mun því hafa miklar framfarir í för með sér.

Noregur ögrum skorinn Göngin verða staðsett suðvestanvert á strandlengju Noregs.

Stutt á milli Hér má sjá hvar göngin verða grafin. Á þessum hluta, innst á skaganum, er styst á milli fjarða.

Göngin stytta ekki aðeins siglingartíma, heldur auka líka öryggi. Haft er eftir Ketil Solvik-Olsen, samgöngumálaráðherra Noregs, að aðstæður til siglinga á suðvesturströndinni séu einkar slæmar. „Hafstraumar og aðstæður á sjávarbotni orsaka sérstaklega erfiðar öldur á þessu svæði,“ segir Ketil.

Hann bætir síðan við: „Við erum afar fegin að skipagöngin verði loks að veruleika.“ Hugmyndir hafi verið uppi á teikniborðinu undanfarin ár, en nú sé verkefnið klárt og komin fjármögnun.

Kosta 35 milljarða

Framkvæmdir við gerð ganganna eiga að hefjast árið 2019 og er áætlað að þeim ljúki 4 árum síðar. Verðmiðinn er í hærra lagi, en hann hljóðar upp á 35 milljarða íslenskra króna.

Frítt fyrir minni skip

Skip sem vega allt að 16.000 tonnum munu geta siglt í gegn um göngin og er fólksflutningsferjum gefinn forgangur. Þó munu alls kyns bátar geta nýtt sér kostinn. Aðgangur að göngunum er frír, ef báturinn er innan við 70 m á lengd.

Grjótið fjarlægt Þessi tölvuteikning sýnir framkvæmdirnar sem fara í hönd. Þær munu að nær öllu leyti fara fram á þurru landi, sem þýðir að munnar ganganna verða lokaðir á meðan.

Mikil framför Stutta gula strikið sýnir lengd ganganna. Punktalínurnar sýna síðan hefðbundnar siglingaleiðir, skip þurfa að leggja langa lykkju á leið sína til að komast umhverfis Stadtlandet-skagann.

Grafið verður innst á Stadtlandet-skaganum, milli fjarðanna Moldefjorden og Kjødepollen, en ekki nema 1,7 km vegalengd er á milli botna þessara tveggja fjarða.

Mál ganganna verða 36 m á breidd og 49 m á hæð. Samkvæmt skipuleggjendum verkefnisins mun þurfa að sprengja upp allmikið af grjóti til að ljúka verkinu – eða ríflega 8 milljarða tonna!