Niðurstöður rannsóknar, sem náði til 57 þúsund kvenna sem eru 55 ára og eldri, leiða í ljós að þær konur sem eru með heilbrigðar tennur eru líklegri til að verða langlífar heldur en þær sem sem eru með skemmdar tennur. Rannsóknin er sú umfangsmesta sem gerð hefur verið á því hvort samband sé á milli tannheilbrigðis og dánartíðni kvenna.

Frá þessu var nýlega greint í Journal of the American Heart Association. Þar segir að konurnar hafi einungis þurft að svara því hvað þær væru með margar alvöru tennur í munninum og hvort þær væru með viðvarandi sjúkdóm í tannholdinu. „Það er góð vísbending um almenna heilsu viðkomandi,“ segir einn vísindamannanna sem stóðu að baki rannsókninni í samtali við CNN.

Þá kom í ljós að þeir sem eru með sjúkdóma eða þráláta kvilla í tannholdinu eru 12 prósent líklegri til að deyja fyrir aldur fram heldur en þær konur sem eru með heilbrigðar tennur. Þær konur sem hafa misst þó nokkrar tennur þegar komið er yfir miðjan aldur eru 17 prósent líklegri til að deyja fyrir aldur fram.

Ekki fannst orsakasamband á milli dræmrar tannheilsu og hjartasjúkdóma.