Alþjóðleg kvikmyndahátíð í Reykjavík, RIFF, hlaut á dögunum styrk frá MEDIA áætlun Evrópusambandsins. Í ár hlutu 31 hátíð styrk af 109 sem sóttu um.
„Undirbúningur er i fullum gangi fyrir næstu hatið sem verður haldin 28 sept til 8 okt og RIFF hefur hlotið þennan styrk nær óslitið frá árinu 2009 sem aðstandendur telja vera mikinn heiður,“ segir Hrönn Marinósdóttir stjórnandi hátíðarinnar.
Til að hátíð hljóti styrk þarf hún að uppfylla ákveðin fjölda skilyrða sem settar eru að Evrópusambandinu. Í umsögn frá forsvarmönnum MEDIA áætlunarinnar segir að Alþjóðleg kvikmyndahátíð í Reykjavík sé í stöðugri þróun og laði að sér fjölda áhorfenda. Hátíðin sé dugleg að nýta sér stafræna miðla sem auka aðgengi almennings að hátíðinni. Einnig standi hátíðin fyrir vandaðri fræðsludagskrá árið um kring og listræn gæði hátíðarinnar séu með því besta sem gerist.
