Yfirheyrslur hafnar yfir hinum grunaða
Þrjár manneskjur voru handteknar í Stokkhólmi í dag vegna árásarinnar í gær þar sem vörubíl var ekið inn í mannfjölda. Lögreglan handtók 39 ára gamlan mann í gær vegna árásarinnar. Fólkið sem handtekið var í dag var í bíl sem er talinn tengjast árásarmanninum. Aftonbladet greinir frá þessu.
Yfirheyrslur hófust í dag yfir manninum sem handtekinn var í gær en hann er talinn bera ábyrgð á dauða minnst fjögurra einstaklinga og hafa slasað fjölda annarra.
Lögreglan í Stokkhólmi hefur ekki viljað tjá sig um aðgerðir sínar í málinu. „Við höfum sagt það frá upphafi að við munum fara varlega í að gefa upplýsingar um svo alvarlegt mál til að gæta hagsmuna fólks,“ segir Kjell Lindgren lögreglumaður í Stokkhólmi.