Nú stendur yfir messa í Westminster Abbey í London sem er tileinkuð fórnarlömbum hryðjuverkaárásarinnar við breska þinghúsið og á Westminster brúnni fyrir tveimur vikum. Fimm létust í árásinni og 27 slösuðust alvarlega.

Einn maður var að verki en eftir að hafa keyrt yfir hóp fólks á Westminster brúnni réðst hann á lögreglumann sem lést.

Messan er fjöltrúarsamkoma og er haldin í nafni vonar. Meðal þeirra tæplega 2000 einstaklinga sem eru viðstaddir messuna eru aðstandendur fórnarlambanna, Vilhjálmur og Harry Bretaprinsar og Katrín hertogaynja af Cambridge.

Vilhjálmur, Katrín og Harry tóku þátt í athöfninni Um það bil 2000 manns mættu í Westmister Abbey í morgun

Bandaríska konan sem var á brúnni ásamt eiginmanni sínum þegar keyrt var á þau með þeim afleiðingum að hann lést og hún slasaðist alvarlega mætti í morgun og var að sögn viðstaddra mjög hrærð yfir samhugi bresku þjóðarinnar.

Líkt og áður hefur komið fram var árásarmaðurinn var skotinn til bana af lögreglumanni en hryðjuverkasamtökin ISIS hafa lýst yfir ábyrgð á hryðjuverkinu.