Kona í Rússlandi fékk dæmdar skaðabætur eftir að hafa „misst meydóminn“ í reglubundinni skoðun hjá kvensjúkdómalækni. Lækninum, sem var einnig kvenkyns, var sagt upp störfum í kjölfarið og hefur málið vakið mikla athygli í Rússlandi.

Í dómsorði kom fram að konan væri 29 ára gömul og afar trúuð. Hún hefði ætlað að halda meydóminum fram að brúðkaupsdegi sínum. Unnusti konunnar yfirgaf hana þegar hann komst að því að hún væri „spjölluð“. Mirror greinir frá.

Atvikið átti sér stað í borginni Novosibirsk. Konan kom í reglubundna skoðun og tók ungur kvenlæknir á móti henni.

„Þetta var fyrsti tíminn minn hjá henni og ég sagði henni að ég væri hrein mey og ætlaði að halda því þannig,“ er haft eftir konunni. Hún segist hafa fundið verk á meðan skoðuninni stóð og síðan séð blóð á hanska læknisins. „En hún fullvissaði mig um að allt væri í lagi,“ sagði konan.

Að hennar sögn var hún með ónotatilfinningu eftir læknisheimsóknina og ákvað því að panta tíma hjá öðrum lækni til þess að ganga úr skugga um að allt væri í lagi. Þá kom í ljós að meyjarhaftið hafði rifnað að hluta. „Ég grét alla nóttina og daginn eftir. Ég gat ekki hætt að gráta. Hvernig gat hún gert mér þetta? Ég gæti aldrei trúað því að ég myndi missa meydóminn með þessum hætti, að ég yrði meðhöndluð á þennan hræðilega hátt. Aðeins Guð veit hversu mikið ég hef þjáðst, sem og móðir mín,“ sagði konan.

Unnusti hennar hafi efast um frásögn hennar varðandi kvensjúkdómalækni og slitið trúlofun þeirra.

Konan fór fram á um 4 milljónir króna í skaðabætur en dómarinn taldi að rétt tæplega 100 þúsund krónur væri hæfilegt.