Nú stendur yfir þriggja daga helgi, vegna verkalýðsdagsins, og hefur verið talsverður erill hjá lögreglunni á Höfuðborgarsvæðinu til þessa.

Í nótt voru níu ökumenn stöðvaðir fyrir grun um akstur undir áhrifum fíkniefna og færðir til blóðsýnatöku. Þar af var einn, sem ók um á stolinni bifreið, vistaður í fangageymslu.

Á þriðja tímanum í nótt var tilkynnt um líkamsárás á dyravörð í miðborginni. Gerandi var enn á vettvangi þegar lögreglu bar að garði.

Klukkan hálf fjögur var tilkynnt um þjófnað og líkamsárás. Einn aðili var í kjölfarið fluttur á bráðamóttöku.

Á milli fjögur og hálf sjö var tilkynnt um þrjár aðskildar líkamsárásir. Tveir menn voru handteknir í tengslum við sitthvora árásina og vistaðir í fangageymslu lögreglu.